ഒരു പോത്തിന്റെ കഥ..

വര്‍ഷങ്ങള്‍ക്കു മുന്‍പിലെ ഒരു നട്ടുച്ച നേരം.ഉച്ച ഭക്ഷണം ഒക്കെ കഴിഞ്ഞു പതിവു പോലെ കടുക്കാച്ചി മാവിന്റെ ചുവട്ടിലേക്കു നടന്നു.മാവു നില്‍ക്കുന്ന പറമ്പ് വീട്ടില്‍ നിന്നും അല്പം അകലെ ആണ്.അച്ഛന്‍ പേരു കേട്ട കൃഷിക്കാരന്‍ ആയതിനാല്‍ ഏകദേശം അഞ്ചേക്കറോളം വരുന്ന പറമ്പില്‍ കപ്പ,വാഴ,ഇഞ്ചി,മഞ്ഞള്‍.പച്ചക്കറികള്‍ തുടങ്ങി എല്ലാ വിളകളും കൃഷി ചെയ്തിട്ടുണ്ടായിരുന്നു.

മാവു നില്‍ക്കുന്ന പറമ്പില്‍ ഇഞ്ചിയും മഞ്ഞളും ആണു മെയിന്‍ കൃഷി.ഇഞ്ച്ചി വാരങ്ങള്‍ക്ക് നടുവില്‍ ആയാണു മാവിന്റെ സ്ഥാനം.അന്നേ സമ്മിശ്ര കൃഷിയില്‍ താല്പര്യം ഉള്ള ആളായതിനാല്‍ " നിന്നെ ഒക്കെ വളര്‍ത്തുന്ന നേരം കൊണ്ട് 10 തെങ്ങിന്‍ തൈ വെച്ചാല്‍ വയസ്സുകാലത്ത് അതിനുള്ള അനുഭവം ഉണ്ടാകും " എന്ന പഴമൊഴിയില്‍ മുറുകേ പിടിച്ചു ഇഞ്ചിവാരത്തിനിടയില്‍ തെങ്ങിന്‍ തൈ നടാനായി കുഴികളും കുത്തി ഇട്ടിട്ടുണ്ടായിരുന്നു.



മാവിന്‍ ചുവട്ടില്‍ വീഴുന്ന മാമ്പഴം അപ്പപ്പോള്‍ പോയി എടുത്തില്ലെങ്കില്‍ അന്നത്തെ എന്റെ ഒന്നാം നമ്പര്‍ ശത്രുവായ എന്റെ പൊന്നാങ്ങള പോയി എടുക്കും എന്നതു കൊണ്ട് ഓരോ അര മണിക്കൂര്‍ കൂടുമ്പോഴും മാവിന്‍ ചുവട്ടില്‍ പോയി നോക്കുക എന്നുള്ളതു അക്കാലത്ത് എന്റെ പതിവായിരുന്നു

എന്നേക്കാള്‍ അവന്‍ ഇളയതാണു എന്നു പറഞ്ഞിട്ടൊന്നും ഒരു കാര്യവും ഇല്ല. ഓട്ടത്തിന്റെ കാര്യത്തില്‍ ഗുണ്ടുമണീ പോലെ ഇരിക്കുന്ന എന്നേക്കാള്‍ വേഗം ഓടിയെത്താന്‍ അവനു കഴിയും അവന്റെ പുറകെ പ്ലിക്കു പ്ലിക്കൂ എന്ന തടിയും വെച്ച് ഉരുണ്ടുരുണ്ടു പോകുന്ന ,ഞാന്‍ താഴെ വീണു കിടക്കുന്ന മാമ്പഴം ചൂണ്ടി അവനോടു പറയും :



" എടാ ചെറുക്കാ, അതു ഞാന്‍ കണ്ട മാമ്പഴമാ.. അതെന്റെയാ, അതു നീ എടുക്കരുത് "


ആദ്യം ഓടിയെത്തിയ അവനുണ്ടോ അതു കേള്‍ക്കുന്നു.അവനെക്കാള്‍ 2 വര്‍ഷം മുന്‍പ് ഈ ഭൂമിയിലേക്ക് വന്നതല്ലേ ഞാന്‍.. മൂത്തവര്‍ വാക്കും മുതു നെല്ലിക്കയും എന്ന കാര്യം ഓര്‍ക്കുക പോലും ഇല്ലാതെ ഞാന്‍ കണ്ടു വെച്ച മാമ്പഴം തന്നെ അവന്‍ ആദ്യം ചാടി എടുക്കും



മാവിന്‍ ചുവട്ടില്‍ വേറെ മാമ്പഴം ഉണ്ടെങ്കിലും ഇതു തന്നെ എടുക്കുന്ന ഇവന്‍ എങ്ങനെ എന്റെ നമ്പര്‍ വണ്‍ ശത്രു ആകാതിരിക്കും



" എന്റെ മാമ്പഴം ഇങ്ങു താടാ.. അതു ഞാന്‍ അല്ലേ ആദ്യം കണ്ടെ"



" ഇന്നാടീ ..ഇതു നീ എടുത്തോ !"



ഹും അവന്റെ വിളി കേട്ടില്ലേ..എടീ എന്ന്



എന്നാലും ആശയോടെ മാമ്പഴം വാങ്ങാന്‍ കൈ നീട്ടി ചെല്ലുന്ന എന്നോട് ഉം.... .".ഇന്നാ നീ മുട്ടു കടിച്ചോ "

എന്നും പറഞ്ഞു കൈയ്യുടെ മുട്ട് നീട്ടിക്കാണിക്കുന്ന അവന്‍ എങ്ങനെ ശരിയാകും?





അങ്ങനെ ഒരു അഭിശപ്ത ദിവസം അവനെ കാണാതെ , മാവിന്‍ ചുവട്ടില്‍ പോയി മാമ്പഴം പെറുക്കിയെടുത്ത് പാവാടയില്‍ തന്നെ ശേഖരിച്ച്,ഇനിയും മാമ്പഴം ചാടുമെങ്കില്‍ എടുക്കാം എന്ന വിചാരത്തോടെ മാവിന്റെ മുകളിലേക്കും നോക്കി " താമസം എന്തേ വരുവാന്‍ "എന്ന പാട്ടും പാടി നടക്കുന്ന സമയം...പാടുന്നതിനൊപ്പം തന്നെ കടുക്കാച്ചി മാമ്പഴം അതിന്റെ ഞെട്ടു കടിച്ചു കളഞ്ഞു ചപ്പി കുടിക്കുന്നും ഉണ്ട്.ആസ്വദിച്ചുള്ള പാട്ടും മാമ്പഴം തീറ്റയും നടക്കുന്നതിനിടെ ഒരു ശബ്ദം !





ഭൂമി കുലുങ്ങുന്നതാണോ അല്ല.എന്തോ ബഹളം ഒക്കെ കേള്‍ക്കുന്നു.എന്തോ സംഭവിക്കാന്‍ പോകുന്ന പോലെ എന്താണെന്ന് മനസ്സിലാവുന്നില്ല. അങ്ങനെ അന്തം വിട്ട് കുന്തം വിഴുങ്ങിയ പോലെ നില്‍ക്കുമ്പോള്‍ അതാ കറുകറുത്തൊരു സാധനം ഇഞ്ചികണ്ടത്തിലേക്കു പാഞ്ഞു വരുന്നു.

എന്റമ്മേ !!! ഇതൊരു പോത്താണല്ലോ.. ആകേ കൂടി സിനിമാ നടന്‍ ജയന്റെ സൌന്ദര്യം ഉള്ള മുഖം.എന്താ ബോഡി ! നല്ല നീണ്ടു വിടര്‍ന്ന കണ്ണുകള്‍ ! നല്ല എണ്ണക്കറുപ്പുള്ള ദേഹം.പക്ഷേ ആ സൌന്ദര്യത്തിനു മങ്ങലേല്പിച്ചു കൊണ്ട് അവിടവിടെ പാടത്തെ ചെളി പുരണ്ടിരിക്കുന്നു.

അല്ല ഇവനെന്തിനാ ഇങ്ങനെ ഓടുന്നേ..അവന്റെ കാമുകിയെ ആരാണ്ട് തട്ടിക്കൊണ്ട് പോയിട്ട് വിറളി പിടിച്ച് ഓടുന്നതു പോലെ.


ഇഞ്ച്ചി വാരങ്ങള്‍ ഒന്നും പ്രശ്നം അല്ലെന്ന മട്ടില്‍ അവന്‍ ഓരോ വാരങ്ങളും ഈസിയായ് ചാടിക്കടന്ന് എന്റെ തൊട്ടടുത്തെത്തി.ഇവന്റെ പുറപ്പാട് എന്തിനെന്നറിയാതെ നോക്കി നിന്ന ഞാന്‍ പിന്നീടു പറക്കുന്ന പോലെ ഒരു തോന്നലായി...


തോന്നല്‍ അല്ല.ശരിക്കും പറക്കുക തന്നെ ആണു.

പെട്ടെന്ന് ധിം എന്നൊരു ഒച്ച. ഒപ്പം എന്റെ എവിടെയൊക്കെയോ ചതയുന്ന പോലെ വേദനയും!! തെങ്ങിന്‍ തൈ നടാനായി അച്ഛന്‍ കുഴി എടുത്തിട്ടിരിക്കുന്നതിലേക്ക് ഞാന്‍ സ്മൂത്തായി ലാന്‍ഡ് ചെയ്ത ഒച്ച ആണു കേട്ടത്.



കണ്ണും മിഴിച്ചു നോക്കിയപ്പോള്‍ അതാ പോത്ത് കൊമ്പും കുലുക്കി എന്റെ നേരെ വീണ്ടും വരുന്നു.



എന്റമ്മോ !!!!!!!!!!!!!!!


ഞാന്‍ ഫുള്‍ ട്രെബിളിലും ബാസിലും ആറരക്കട്ടയിൽ തന്നെ നാലു നെലോളി പാസാക്കി....അല്പം പോലും ഒച്ച പുറത്തു വന്നില്ലെങ്കിലും !!


തെങ്ങും കുഴിയില്‍ ഒടിഞ്ഞു മടങ്ങിക്കിടക്കുന്ന എന്നെ കണ്ടിട്ട് പാവം തോന്നിയിട്ടോ എന്തോ വെട്ടാന്‍ വന്ന പോത്ത് എന്നെ വിട്ടു പാഞ്ഞു.


പോത്ത് ഇഞ്ച്ചിപ്പറമ്പിലേക്കു കയറി വരുന്നതു കണ്ട അമ്മയും അച്ഛനും ഒക്കെ ഞാന്‍ വടിയായിക്കാണും എന്ന ധാരണയില്‍ ഉറക്കെ കരഞ്ഞ് ,പറമ്പിലേക്ക് ഓടിക്കയറി വരുന്നുണ്ടായിരുന്നു..പറമ്പിലെങ്ങും എന്നെ കാണാഞ്ഞ് ഉറക്കെ കരഞ്ഞ അമ്മയുടെ ഒച്ച കേട്ടപ്പോള്‍ ഞാന്‍ എന്റെ വോളിയം ഒന്നൂടെ കൂട്ടി..

" .അമ്മേ !!!! " ഇത്തവണ ഒച്ച പുറത്തു വന്നു


തെങ്ങിന്‍ കുഴിയില്‍ നിന്നും എന്നെ വാരിയെടുത്ത് വീട്ടിലേക്ക് കൊണ്ടു പോയപ്പോളും, അര്‍ദ്ധ ബോധാവസ്ഥയിലും ഞാന്‍ അമ്മയോട് പറഞ്ഞത് "ആ മാമ്പഴം അനിയനു കൊടുക്കല്ലേ" എന്നായിരുന്നുവത്രേ!!





പോത്ത് ആ ഓട്ടത്തില്‍ നേരെ അടുത്ത വീട്ടിലെ മുറ്റത്ത് പുഴുങ്ങിയ നെല്ലു മുറ്റത്തെ പനമ്പില്‍ ഇട്ടു ചിക്കിക്കൊണ്ടിരുന്ന സുബൈദത്താത്തയെ വെട്ടിയിട്ടിട്ടാണ് കടന്നത്.ഇടത്തേ വയറില്‍ കൊമ്പു കുത്തിക്കേറി ഒരു മാസത്തോളം ഇത്ത ആശുപത്രിയില്‍ ആയിരുന്നു.





ഇത്തയെ കുത്തിമലര്‍ത്തി വീണ്ടും പാഞ്ഞ പോത്തിനെ അവസാനം കോട്ടപ്പടി പോലീസ് സ്റ്റേഷനില്‍ നിന്നും പോലീസ് എത്തി വെടി വെച്ചു കൊന്നു എന്നാണേ പിന്നീട് അറിഞ്ഞത്.



പക്ഷേ അന്നു വെടി വെക്കേണ്ടിയിരുന്നത് ആ പോത്തിനെ അല്ലായിരുന്നു.പാടത്തു ഉഴുവാന്‍ വേണ്ടി നിര്‍ത്തിയിരുന്ന പോത്ത് നല്ല പോലെ ഉഴുവാന്‍ വേണ്ടി അല്പം കള്ള് കുടിപ്പിച്ച സാക്ഷാല്‍ ഉഴവുകാരന്‍ പോത്തിനെ ആയിരുന്നു.കള്ളു കുടിച്ചാല്‍ മനുഷ്യന്‍ തന്നെ 4 കാലിലാ നടക്കുന്നെ..പിന്നെ പാവം പോത്തിന്റെ കാര്യം പറയണോ ?

എന്തായാലും ആ സംഭവത്തിനു ശേഷം ഞാന്‍ എന്തു കുരുത്തക്കേടു കാണിച്ചാലും എന്നെ എല്ലാവരും സ്നേഹപൂര്‍വ്വം എടീ പോത്തേ എന്നേ വിളിക്കുമായിരുന്നുള്ളൂ..നല്ലോര് പെങ്കൊച്ചായ എന്നെ വിളിക്കുന്ന പേരേ...കലികാലം അല്ലാതെന്താ ??