ഒരു യാത്രയുടെ സ്മരണക്ക്

വിവാഹം കഴിഞ്ഞ് ഭര്‍തൃ ഭവനത്തില്‍ എത്തി ആദ്യം നടത്തിയ യാത്ര വീടിന് അടുത്ത് തന്നെ ഉള്ള കാവിലേക്കാണ്.ഞങ്ങളുടെ വീട്ടില്‍ നിന്നും നടന്നു പോകാന്‍ ഉള്ള ദൂരമേ അന്നുണ്ടായിരുന്നുള്ളൂ..ഇന്നാണെങ്കില്‍ വണ്ടിയും സൌകര്യങ്ങളും ഒക്കെ ആയപ്പോള്‍ നടക്കുന്ന കാര്യം അല്പം വിഷമം ആണ് എന്നു മാത്രം !!


കേരളത്തിലെ ഏറ്റവും വലിയ കാവ് ആണ് ഇരിങ്ങോള്‍ കാവ്.പെരുമ്പാവൂര്‍ നഗര പരിധിക്കുള്ളിലല്‍ ഏകദേശം 20 ഹെക്ടര്‍ ചുറ്റളവിലുള്ള ഒരു വനത്തിനു നടുവില്‍ ഉള്ള ഒരു ദേവീക്ഷേത്രം ! നഗരത്തിനുള്ളിലെ ഈ കാടു തന്നെ ഒരു വിസ്മയം ആണ്. 20.234 ഹെക്ടര്‍ വിസ്തീര്‍ണ്ണം ഉള്ള ഇരിങ്ങോള്‍ കാവിലെ പ്രതിഷ്ഠ ദേവി ആണു.ഭഗവതി ഇവിടെ 3 രൂപത്തില് കാണുന്നു. രാവിലെ സരസ്വതീ ദേവി,ഉച്ചക്ക് വന ദുര്‍ഗ്ഗ,രാ‍ത്രിയില്‍ ഭദ്രകാളി എന്നിങ്ങനെ ആണു ദേവിയുടെ രൂപങ്ങള്‍.

ചെത്തി,തുളസി, താമര എന്നിവ മാത്രമേ ഇവിടെ പൂജക്ക് ഉപയോഗിക്കാറുള്ളൂ.ഇവിടെക്കുള്ള ചന്ദനം ഈ കാട്ടില്‍ നിന്നു തന്നെ ആണു എടുക്കുന്നത്.അന്നന്നത്തെ ആവശ്യത്തിനുള്ള ചന്ദനവേര് ക്ഷേത്രക്കുളത്തിലേക്ക് വളര്‍ന്നു വരും എന്നാണു വിശ്വാസം !!

ഉപദേവന്മാര്‍ ഇല്ലാത്ത കേരളത്തിലെ തന്നെ അത്യപൂര്‍വ്വമായ ക്ഷേത്രങ്ങളില്‍ ഒന്നാണിത്.

പണ്ട് ഇരിങ്ങോള്‍ കാവ് 32 ഇല്ലങ്ങളുടെ ഭരണത്തിന് കീഴിലായിരുന്നു.ഇപ്പോള് അതു തിരുവിതാംകൂര് ദേവസ്വം ബോര്‍ഡ് ആണു നിയന്ത്രിക്കുന്നത്.


പ്രകൃതി ക്ഷോഭങ്ങളെയും മനുഷ്യന്റെ അത്യാര്‍ത്തിയെയും അതിജീവിച്ച വനപ്രദേശം ! നഗര പ്രദേശത്തെ ശ്വാസം മുട്ടിക്കുന്ന മലിനമായ അന്തരീക്ഷത്തില്‍ നിന്ന് ഒരു മോചനം ലഭിക്കണമെങ്കില്‍ ഇവിടേക്ക് വരാം.കഠിനമായ വേനല്‍ക്കാലത്തു നട്ടുച്ചക്കു പോലും പ്രകൃതി നല്‍കുന്ന കുളിര്‍മ്മ അനുഭവിച്ചറിയാന്‍ ഇവിടെ വന്നാല്‍ മതി.പ്രകൃതി നല്‍കുന്ന എ സി യില്‍ മനം കുളിര്‍ന്നിരിക്കാം.മരച്ചില്ലകളില്‍ നിന്നുള്ള പക്ഷികളുടെ കള കൂജനങ്ങള്‍ നമ്മളെ മറ്റൊരു ലോകത്തെത്തിക്കും തീര്‍ച്ച. !

കുട്ടികള്‍ക്കും മുതിര്‍ന്നവര്‍ക്കും അവധിക്കാലം ചിലവഴിക്കാന്‍ പറ്റിയ സ്ഥലമാണിത്.സാധാരണ വനങ്ങള്‍ എന്നു പറയുമ്പോള്‍ അവിടേക്ക് എത്തിപ്പെടാന്‍ ഉള്ള ബുദ്ധിമുട്ട് ഒക്കെ ആണു നമ്മുടെ മനസിലേക്ക് വരിക.പക്ഷേ ഇവിടെ വനത്തില്‍ എത്താനും എളുപ്പമാണ്.വനത്തിനുള്ളിലൂടെ നടക്കാനോ എത്ര രസം ആണെന്നറിയാമോ ? ശല്യം ഉണ്ടാക്കുന്ന തരത്തില്‍ ഉള്ള കുറ്റിച്ചെടികളും മുള്‍ച്ചെടികളും ഇവിടെ കുറവാണ്.


ഈ വനത്തിനുള്ളില്‍ 500 വര്‍ഷം വരെ പ്രായം ഉള്ള മരങ്ങള്‍ ഉണ്ടത്രെ ! ഇവിടെയുള്ള അപൂര്‍വ്വ സസ്യജാലങ്ങളില്‍ തിപ്പലി,കുരുമുളക്,പാതിരി തുടങ്ങിയ വിലയേറിയ ഔഷധ സസ്യങ്ങള്‍ ,നിത്യ ഹരിത വനങ്ങളില്‍ മാത്രം കാണാറുള്ള കാവ് ,തമ്പകം,വെള്ളപൈന്‍ തുടങ്ങിയ വൃക്ഷങ്ങളും ഉള്‍പ്പെടുന്നു.കൂടാതെ ഇവിടെ തത്ത,കുയില്‍,മൈന,പരുന്ത്,പുള്ള്,നത്ത് തുടങ്ങിയ പക്ഷികളും മുയല്‍ ,കുരങ്ങ് എന്നീ മൃഗങ്ങളും കാണപ്പെടുന്നു. നട്ടുച്ച സമയത്തു പോലും സൂര്യ പ്രകാശം ഉള്‍വനങ്ങളില്‍ നിലത്ത് പതിക്കില്ലാത്രേ !നല്ല പെരുവന്‍ തേരട്ട ഈ കാട്ടില്‍ സുലഭം ആണ്.


ഇവിടുത്തെ കുരങ്ങന്മാരെ കൊണ്ട് ഒരു കാലത്ത് ശല്യമായിരുന്നു. എന്ന് അയല്‍ വാസികളില്‍ പലരും പറഞ്ഞു.ഭക്ഷണ സാധനങ്ങള്‍ മോഷ്ടിക്കുക എന്നത് ഒരു കലയായി എടുത്തിരുന്നു വാനരന്മാര്‍..ദേവിയുടെ മക്കള് ആയതിനാല് നാട്ടുകാര് ഒന്നും ചെയ്യുകയും ഇല്ലായിരുന്നു.

ഈ കാവിനെയും കാടിനെയും ചുറ്റി പറ്റി അനേകം കേട്ടു കേള്‍വികള്‍ ഉണ്ട്.അതിലൊന്നു താഴെ പറയും പോലെയാണ്.

ഒരു കാലത്ത് ഈ വനത്തില് നിറയെ ചന്ദന മരങ്ങള് ഉണ്ടായിരുന്നു.ഈ മരങ്ങള്‍ മുറിക്കാനായി ഒരിക്കല്‍ കള്ളന്മാര് വന്നു.പകല്‍ വന്നു മുറിക്കേണ്ട ചന്ദന മരങ്ങള് ഒരു ചുവന്ന റിബ്ബണ്‍ കൊണ്ട് കെട്ടി അടയാളം വെച്ചു പോയി. പകല്‍ മാര്‍ക്ക് ചെയ്ത മരങ്ങള്‍ രാത്രി മുറിക്കാനായി കള്ളന്മാര്‍ എത്തിയപ്പോള്‍ ആ വനത്തിലെ എല്ലാ മരത്തിലും ചുവന്ന റിബ്ബണ്‍.അങ്ങനെ അവര്‍ക്ക് ഒന്നും മുറിക്കാന്‍ പറ്റാതെ വന്നു !

കഥ ആണെങ്കിലും അല്ലെങ്കിലും ഈ കാവിനുള്ളിലെ മരങ്ങള്‍ ആരും മുറിക്കാറില്ല.കാറ്റത്തു മറിഞ്ഞു വീഴുന്ന മരങ്ങള്‍ വിറകിനായി പോലും ആരും എടുക്കാറില്ല. അതു വെറുതേ മണ്ണില്‍ ദ്രവിച്ചു ചേരുകയേ ഉള്ളൂ..അതു കൊണ്ട് തന്നെ ആയിരിക്കണം ഈ കാവ് അതു പോലെ തന്നെ നില്‍ക്കുന്നത്.





1983 ഇല് വീശിയടിച്ച കൊടുങ്കാറ്റില്‍ നിന്ന് തദ്ദേശീയരെ രക്ഷിച്ചത് ഈ ഈ കാവ് ആണെന്ന് പരിസരവാസികളില്‍ ചിലര്‍ പറയുകയുണ്ടായി.

ആലുവ – മൂന്നാര്‍ റോഡില്‍ പെരുമ്പാവൂരിനും കുറുപ്പം പടിക്കും ഇടയില്‍ ആയാണ് ഇരിങ്ങോള്‍ കാവു സ്ഥിതി ചെയ്യുന്നത്.പെരുമ്പാവൂരില്‍ നിന്നു കുറുപ്പം പടി വഴി കോതമംഗലം,അകനാട്,മൂവാറ്റുപുഴ തുടങ്ങിയ ഭാഗങ്ങളിലേക്കുള്ള ബസില്‍ കയറീ “ ഇരിങ്ങോള് പോസ്റ്റ് ഓഫീസ് ജംഗഷനില്‍ “ ഇറങ്ങുക.ഈ സ്റ്റോപ്പ് പെരുമ്പാവൂരില്‍ നിന്നും ഏകദേശം 2 കി മീ മാത്രം അകലെയാണ്.ഇവിടെ ഇറങ്ങി തെക്കോട്ടേക്കുള്ള വഴിയില്‍ ഉദ്ദേശം 500 മീറ്റര്‍ നടന്നാല്‍ ഇരിങ്ങോള്‍ കാവിലെത്താം.

മറ്റു വിനോദ സഞ്ചാര കേന്ദ്രങ്ങളില് നിന്നും വ്യത്യസ്തമായി ഇവിടെ പ്രവേശന ഫീസോ അല്ലെങ്കില്‍ സന്ദര്‍ശനത്തിനു പ്രത്യേക സമയമോ ഇല്ല.ദേവിയെ തൊഴാന്‍ ഉദ്ദേശിച്ചു വരുന്നതാണെങ്കില്‍ ആ സമയത്ത് വരാന്‍ ശ്രദ്ധിക്കുക. അതല്ല വിനോദ സഞ്ചാരം മാത്രം ആണുദ്ദേശമെങ്കില്‍ ഇഷ്ടമുള്ള സമയത്തു വരിക.



ഞങ്ങള്‍ കാവില്‍ പോയി തൊഴുത് വനത്തിലൂടെ അല്പം നടന്നു “ രാമനോടും കൃഷ്ണനോടും കിന്നാരം പറഞ്ഞു,പക്ഷികളുടെ ഗാ‍നം ആസ്വദിച്ച് ഉച്ച വരെ അവിടെ ചെലവഴിച്ചു..വഴിക്കു കണ്ട കടയില്‍ നിന്നും തണ്ണിമത്തങ്ങയും വാങ്ങി കഴിച്ചു അവിടെ ചെലവഴിച്ച നിമിഷങ്ങള്‍ ജീവിതത്തില്‍ ഒരിക്കലും മറക്കാന്‍ പറ്റാത്തവയാണ്.വേറെ പല സ്ഥലങ്ങളിലും പിന്നീട് ഒരുമിച്ച് പോയിട്ടുണ്ടെങ്കിലും ആദ്യത്തെ യാത്രയുടെ മധുരം .. അതൊന്നു വേറെ തന്നെയല്ലേ.


പെരുമ്പാവൂര്‍ വഴി വരുന്ന എല്ലാ ബൂലോകരും ഇവിടെ ഇറങ്ങി നഗരത്തിനുള്ളിലെ ഈ വനപ്രദേശത്തു പോയി കാടിന്റെ സൌന്ദര്യം ആസ്വദിച്ചു വേണം പോകാന്‍ ..എല്ലാവരെയും ഹാര്‍ദ്ദമായി സ്വാഗതം ചെയ്യുന്നു .!! ഒപ്പം എന്റെ വീട്ടിലേക്കും.കപ്പയും കാന്താരിച്ചമ്മന്തിയും കട്ടന്‍ കാപ്പിയും തന്നു സല്‍ക്കരിക്കുന്നതായിരിക്കും !


* രാമനും കൃഷ്ണനും കാട്ടിലെ കുരങ്ങന്മാര് ആണ്..



ചിത്രത്തിനു കടപ്പാട് : ഗൂഗിള്‍